सुनगाभा सैनामैना गोल्डकप फुटबल प्रतियोगिताको तयारी पुरा,भारत सहित १० टिम सहभागि हुने

सैनामैना नगरपालिकाका मेयर फणेन्द्र प्रसाद शर्माको नेतृत्वको टिमले पुर्वाधार विकास मात्र नभई खेल क्षेत्रको श्रवृद्धिका लागी चासो दिएको पाईन्छ । नगरपालिकाले उपयुक्त खेलमैदान र प्याराफिड बनाएकै कारण राष्ट्रियस्तरको प्रतियोगिता हुन लागेको हो ।

सुरेश परियार,फाल्गुन १७ गते । रुपन्देहीको सैनामैनामा सर्वाधिक राशीको फुटबल प्रतियोगिता हुने भएको छ । मुर्गिया फुटबल क्लब सैनामैना नगरपालिका वडा न.४ रुपन्देहीको आयोजनामा सुनगाभा सैनामैना गोल्डकप फुटबल प्रतियोगिता हुन लागेको हो । सैनामैना वडा न.४ स्थित सैनामैना फुटबल रंगशालामा १९ फाल्गुन देखि २८ गते सम्म सो प्रतियोगिता सञ्चालन हुन लागेको मुर्गिया फुटबल क्लब अध्यक्ष प्रविण भारीले जानकारी दिए ।

प्रतियोगितामा १० टिमको सहभागिता रहने छ । जसमा एक भारतीय टिम र ९ नेपाली टिम रहने शनिबार पत्रकार सम्मेलन मार्फत खेल संयोजक अशोक खड्काले जानकारी दिए । खड्काका अनुसार मुर्गिया फुटबल क्लब,नेपाल पुलिस क्लब,नेपाल एपिएफ एफसी काठमाण्डौ,भारतीय सिक्किम,महाविर क्लब काठमाण्डौ,अभिषेक चर्च रजहर नवलपुर,हनामी बि.एफ.सी,चितवन,कपिलवस्तु ११,गोर्खा ब्वाईज रुपन्देही,फर्साटिकर युथ क्लब रुपन्देही विच प्रतिस्पर्धा हुनेछ ।प्रत्येक टिमले ५ जना सम्म विदेशी खेलाडी राख्न पाउने व्यवस्था कायम गरिएको छ । खेलाडीको स्वास्थ्य सुरक्षाका लागी १ लाख सम्मको स्वास्थ्य बिमा गरिने भएको छ ।उद्धघाटनमा मुर्गिया फुटबल आयोजक र गोर्खा ब्वाईज रुपन्देही विच हुने छ ।

खेलकुदको माध्यमबाट सैनामैनाको गरिमा अन्र्तराष्ट्रिय जगतमा जाने सैनामैना नगरपालिका वडा न.४का वडाअध्यक्ष राम प्रसाद अधिकारीले बताएका छन् । युवाहरुले थालेको उदारणीय कार्यमा जनप्रतिनिधि सधै तत्पर भएको भन्दै प्रतियोगिता सम्पन्न गर्न वडा कार्यालयको तर्फबाट रु.२ लाख ५० हजार सहयोग भएको प्रतिबद्धता व्यक्त अधिकारीले गरे ।

प्रतियोगिता सम्पन्न गर्न अनुमानित रु.६५ लाख सम्म खर्च लाग्ने आर्थिक संयोजक गोपाल खड्काले जानकारी दिए । प्रतियोगितामा प्रथम राशीको सौजन्य सुनगाभा पब्लिक माध्यामिक विधालयले गरेको छ भने सैनामैना नगरपालिका वडा न.४ वडा कार्यालय,सैनामैना नगरपालिकाले आवश्यक सहयोग गरेको हो ।टिकट र विभिन्न संघसंस्था,चन्ददाताहरुले प्रतियोगिताका लागी आर्थिक सहयोग गरेको खड्काले उल्लेख गरे ।प्रथम हुने टिमले रु.७ लाख राशी,शिल्ड र मेडल,द्धितिय हुने टिमले रु.४ लाख राशी,शिल्ड र मेडल,सेमिफाइनल र विधागत खेलाडीहरुलाई समेत नगद र पुरस्कारद्धारा सम्मान दिईने जनाईएको छ ।

प्रतियोगितामा जेष्ठ नागरिक र अपांगता भएका व्यक्तिहरुलाई प्रवेश शुल्क निशुल्क गरिएको छ भने विधार्थीहरुलाई ५० प्रतिशत छुट दिईएको सैनामैना गोल्डकप फुटबल प्रतियोगिताका टिकट संयोजक सुशिल पौडेलले जानकारी दिए । पौडेलका अनुसार अन्य खेलप्रेमीको हकमा भने प्रति.रु.१ सय देखि २ सय सम्म टिकट दर कायम भएको छ । टिकटबाट रु.२० लाख सम्म रकम उठाउने लक्ष्य राखेको बताईएको छ ।

सुविधा सम्पन्न रंगशाला र प्याराफिडबाट खेलप्रेमीहरुले खेल अवलोकन गर्न पाउँने अनुगमन समितिका संयोजक सुवास क्षेत्रीले जानकारी दिए । ३५ देखि ४० हजार सम्म खेलप्रेमीहरुले उपस्थिति रहने आंकलन गरिएको छ ।

खेल अवलोकनका लागी आउने सम्पुर्ण खेलप्रेमीहरुलाई समान व्यवहार र आतिथ्यता प्रकट गर्ने अतिथि सत्कारका संयोजक दिपेन्द्र सुवेदीले बताए । खेलको तयारी पुरा भएको उल्लेख गर्दै अवलोकनका लागी सवैलाई आग्रह समेत गरे । पत्रकार सम्मेलनमा कार्यक्रम सञ्चालन पत्रकार कृष्ण भण्डारीले गरेका थिए ।

युवाहरुमा फुटबल प्रति क्रेज बढेको प्रतियोगिताका टिम संयोजक श्री दर्लामी मगरले बताएका छन् । ख्याती प्राप्त खेलाडीहरुको आगमनले खेलको रौनकता बढ्ने भन्दै खेल अवलोकनका लागी दर्लामीले आग्रह गरे ।